Елдегі үшінші мегаполис — Шымкент қаласында «Достық» шағын ауданының тұрғындары коммуналдық және инфрақұрылымдық мәселелердің шешілмей келе жатқанына наразылық білдіруде. Олардың айтуынша, бұл проблемалар ұзақ уақыттан бері көтерілгенімен, аудандық билік тарапынан нақты әрекет байқалмайды.
Тұрғындардың негізгі шағымы Абай ауданы әкімдігіне бағытталған. Халық жолдардың жағдайы, электр жарығының жиі өшуі және қауіпсіздік мәселелері бойынша бірнеше рет арызданғанын айтады. Алайда, олардың пікірінше, бұл мәселелерге тиісті деңгейде көңіл бөлінбей келеді.
Тұрғындарды ерекше алаңдататыны – аудан басшылығымен ашық диалогтың болмауы. Жергілікті халықтың айтуынша, аудан әкімі Шакир Султанхан осы уақытқа дейін шағын аудан тұрғындарымен кездесіп, олардың мәселесін тыңдамаған. Тіпті кейбір тұрғындар әкімді бірде-бір рет көзбен көрмегендерін айтып отыр.
Осыған байланысты тұрғындар арасында «аудан әкімі өз міндетін толық атқарып отыр ма?» деген сұрақ жиі қойыла бастаған. Олардың пікірінше, халықпен кері байланыстың болмауы мен қарапайым тұрмыстық мәселелердің ұзақ уақыт бойы шешілмеуі басқаруда елеулі олқылықтардың бар екенін көрсетеді.
Микроаудандағы ең өзекті мәселелердің бірі – жолдардың жағдайы. Көшелерде терең шұңқырлар көп. Жаңбыр жауған сайын олар үлкен лайсаң көлшіктерге айналады. Мұндай жолмен жүру ересектерге де қиын, ал мектепке қатынайтын балалар мен егде жастағы тұрғындар үшін бұл тіпті ауыр сынаққа айналған.
Мектеп оқушыларының айтуынша, сабаққа жету кей күндері нағыз қиындық туғызады.
«Жаңбыр жауса, барлық жерде үлкен шұңқырлар мен көлшіктер пайда болады. Аяғымыз үнемі су болады. Сондықтан мектепке қосымша аяқ киім алып баруға тура келеді», – дейді шағын аудан оқушыларының бірі.
Тұрғындар жол мәселесінің ұзақ уақыттан бері шешілмей келе жатқанын айтып шағымдануда.
«Әкімдікке бірнеше рет арыз жаздық. Бірақ еш өзгеріс жоқ. Әр жаңбырдан кейін көшелер батпаққа айналады. Балалар мектепке дұрыс бара алмайды, қарттарға сыртқа шығу қиын. Кейде біздің шағын ауданды мүлде ұмыт қалдырғандай әсер қалдырады», – дейді «Достық» шағын ауданының тұрғыны.
Қауіпсіздік мәселесі де тұрғындарды алаңдатып отыр. Кейбір көшелерде кәріз құдықтарының қақпақтары ашық күйде жатыр. Жергілікті халық кез келген сәтте оған бала немесе егде адам құлап кетуі мүмкін деп қауіптенеді. Айтуларынша, бұл мәселе бойынша бірнеше рет хабарланғанымен, әлі күнге дейін шешімін таппаған.
Оған қоса, шағын ауданда электр жарығының жиі өшуі де тұрғындарға қолайсыздық тудыруда. Тұрғындардың айтуынша, кей кездері жарық ешқандай ескертусіз өшіп қалады.
Қоғамдық көлік мәселесі де өзекті күйінде қалып отыр. Тұрғындар №48 автобус бағыты жолаушылар легін көтере алмай отырғанын айтады. Әсіресе қарбалас уақытта автобустар лық толып, адамдар салонға әрең сыйып мінуге мәжбүр.
Сондықтан тұрғындар бұл бағытқа сыйымдылығы үлкен автобустар шығаруды талап етеді. Олардың айтуынша, бұл жұмысқа және оқуға қатынайтын азаматтардың қауіпсіз әрі жайлы жүруіне мүмкіндік береді.
Жиналып қалған мәселелердің көптігіне байланысты тұрғындар аудан билігінің әрекетсіздігіне алаңдаулы. Олар қала басшылығы жағдайға назар аударып, аудан әкімдігінің жұмысына тиісті баға береді деп үміттенеді. Тұрғындардың пікірінше, егер мәселелер әрі қарай да ескерусіз қалса, бұл жергілікті билікке деген халық сенімінің одан әрі төмендеуіне әкелуі мүмкін.
