Көктем келісімен қала сыртында дем алып, саябақтарда қыдырулар басталады.Осы орайда өзіңізді қауіпті жағдайлардан сақтандыруыңыз қажет. Бұл қауіпті кезең кенелерден болуы әбден мүмкін. Көзге көрінбейтін түрлі шөптердің арасында болатын жәндіктің шағуы ауруларға алып келері анық. Мұндай жәндіктен қорғану үшін нестеу керек?
Мамандар күн жылысымен бұл қауіпті жәндіктің көбейетінін растап отыр.Табиғатқа шыққанда жабық, ақ немесе көк түсті киім кию керектігін айтады. Өйткені қансорғыш жәндікті ашық түсті матадан тез байқап,қауіптің алдын-алуға мүмкіндік бар. Үйге іргелес қора-жайларда, елді-мекендерде кенеге қарсы көктемгі залалсыздандыру жұмыстары 15 сәуір мен 31 мамыр аралығында жүргізілмек. Онда әр аудан бойынша арнайы кесте бекітіліп 18 дезинфектор мамандар, 6 бүркуіш аппарттары және 6 газел автокөлігі жұмылдырылмақ.
Теріге енген кенені бірден алып тастау оңай емес. Сондықтан дәрігердің көмегі қажет.Жәндік шаққан кездегі алғашқы белгілері адамның басы қатты ауырып, дене қызуы 37-39 градусқа дейін көтерілуі мүмкін. Тіпті, дене қалтырап, тері бөртіп қызаруы да байқалады. Сондай-ақ бұлшықет ауырып, адамның тыныс алуы қиындап, тамаққа деген тәбеті жоғалып, жиі шаршаңқы күйге түседі. Ондай кезде адам өз бетінше әрекетке бармай бірден дәрігердің қабылдауына жүгінген абзал дейді,мамандар.
Айта кету керек жауапты сала мамандары елді мекендерде кенеге қарсы залалсыздандыру жұмыстары жүргізілу кезінде өте мұқият болып, дәрілерден араларды сақтап қалу жолын қарастыруды сұрайды. Өйткені қауіпті жәндіктерді жою барысында кей жәндіктерге зияны тиіп кетуі мүмкін екендігін алға тартты. Көп жағдайда қауіпсіздіктің алдын алмастан опық жеп жататындардың баршылығы жасырын емес. Сондықтан да «сақтықта қорлық жоқ» деген қағиданы жанымызға жақын ұстағанымыз абзалырақ.
