Наурыз –мерекесі жаңару мен жақсылықтың, ырыс пен берекенің мейрамы. Күн мен түн теңесіп, табиғат қайта түлейтін бұл мереке қазақ халқы үшін ерекше мәнге ие. Ата-бабаларымыз бұл күнді жаңа жылдың басы деп қабылдап, ескі өкпе-ренішті ұмытып, ақ дастархан жайып, бір-біріне ізгі тілектерін арнаған. Наурыз – тек табиғаттың ғана емес, адам санасының, рухының да жаңғыратын кезі.Осы көктемнің жарқын мейрамын академик Ә.Қуатбеков атындағы Халықтар достығы университетіде дүркіретіп тойлады. Оқу орда алдында ойын-сауық думандары ұйымдастырылды. Мерекелік шараға жиналған студенттер дастархан жайып, көңілді әндер айтып, Наурыз мейрамының сәнін кіргізді. Күн мен түн теңеліп, табиғат жаңарып, жер дүниеге көктем шуағын ала келген Наурыз мерекесі биыл да оқу ордада сән-салтанатымен аталып өтілді. Берекенің бастауы, ырыстың арқауы болған бұл мейрамды жиналған оқытушылар мен студенттер ұлттық дәстүрмен, дархан көңілмен қарсы алды. Тігілген Ақ шаңқан киіз үй қазақы дәстүрдің, дархан пейілдің айнасына айналды. Қонақжай ақсақалдар мен ақ жаулықты аналар жиналып, елге ақ батасын беріп, ұлттық тағамдар дайындалды. Құрт-ірімшік, бауырсақ, қымыз сынды ұлттық тағамдар дастарханға қойылып, мерекенің ажарын аша түсті.
Әз-Наурыз мерекелік шарамен басталды. Ұлттық киім киген жастар мен өнерпаздар салтанатты шараның сән-салтанатын айшықтай түсті.Мерекелік шарада әуелеген әндер мен күмбірлеген күйлер Наурыздың ажарын аша түсті. Жастар мен өнерпаздар сахна төрінде халық әндерін орындады. Мерекелік шараға оқу орда ректоры мен арнайы шақырылған қонақтар сөз алып Ұлыстың ұлы күнімен құттықтап, жылы лебіздерін білдіріді.
Мереке аясында жастар халқымыздың бай мәдени мұрасын дәріптеп, ұлттық салт-дәстүрлерден театрландырылған көріністер қойды. Бесікке салудан бастап, қыз ұзату, беташар, сырға салу, тұсау кесер сынды ғұрыптарды сахналап, көрермендерге рухани азық сыйлады. Қойылым барысында алдымен бесік тойы сахналады. Жаңа туған нәрестені ақжаулықты әжелер күміс теңгелер салынған бесікке бөлеп, бесік жыры шырқалды. Қазақтың “Ел боламын десең, бесігіңді түзе” деген дана сөзі тағы бір мәрте еске түскендей болды.Келесі көріністе тұсау кесер салтанаты орын алды. Баланың тұсауын ала жіппен кесіп, “Желдей жүйрік, қырандай алғыр бол!” деп ақ батасын берген үлкендер жас ұрпаққа ізгі тілек арнады. Қаз-қаз басқан балақайдың әр қадамы болашаққа бастар жарқын жолдың белгісіндей әсер қалдырды.Мерекенің тағы бір ерекше сәті – қыз ұзату рәсімі болды. Ұзатылар қыздың анасы оң жақтағы бұрымды бойжеткенге ақ батасын беріп, “Қызды қырық үйден тыйсаң да, ол ертең бір елдің анасы” деген аталы сөзбен жаңа өмірге қадам бастырды. Ағайын-туыс, құда-жекжат жиналып, қимастықпен қоштасып, ақ жол тіледі.Сырға салу рәсімінде жігіттің ата-анасы болашақ келіндеріне алтын сырға тағып, екі жастың жарасымды жұп боларына сенім білдірді. Сырға – адалдық пен сенімділіктің белгісі екені айтылып, жастарға тағылымды тәрбие берілді.Ал беташар дәстүрі бойынша ақын жігіт домбырамен жыр төгіп, жаңа түскен келінді таныстырып, үлкендерден бата сұрады. Ақ жаулықты аналар “Келін енесінен тәтті болсын!” деп, жас келінге шапан жауып, отбасының ұйытқысы болуын тіледі.Наурыз мейрамы тек көктемнің келуін емес, ұрпақтар сабақтастығын, халықтың дәстүрге деген құрметін білдіретін ұлық мереке. Университет қабырғасында ұлттық салт-дәстүрлерді дәріптеуге арналған осындай шаралардың ұйымдастырылуы – жас буынның төл мәдениетіне деген сүйіспеншілігін оятатыны сөзсіз.
Мерекелік шарада белсенді жастар өз өнерлерін ортаға салып, нағыз шығармашылық кешке айналдырды. Бірі мың бұрала би билеп, сахнаны қыздыра түссе, енді бірі әуелете ән шырқап, көрермендердің ыстық ықыласына бөленіп көз айымына айналды. Әсем ән мен көңілді күй, ұлттық нақыштағы қойылымдар шараның шырайын аша түсті. Белсенді жастар оқу орнының берген мүмкіндіктерін мақтан тұтатындарын жеткізді. Білім мен өнерді қатар алып жүрген жас дарындар университет қабырғасында тек сапалы білім алып қана қоймай, өз таланттарын шыңдауға да үлкен қолдау барын ерекше атап өтті.
Наурыз – бұл жаңа бастамалардың, татулық пен ырыстың, мейірім мен ізгіліктің мерекесі. Университет ұжымы осы игі дәстүрді одан әрі жалғастырып, елдің рухани құндылықтарын дәріптеуге әрдайым атсалыса бермек. Шара соңында ата-бабалар рухына Құран бағышталып, ақ дастархан жайылды. Қонақтар ұлттық тағамдардан дәм татып, наурыз көженің берекесін көрді. Ақсақалдар мен ұстаздар жастарға ақ батасын беріп, білім мен өнер жолында жетістіктер тіледі.
