Шымкент қаласының ішкі саясат және жастар істері жөніндегі басқармасының «Жастар ресурстық орталығы» КММ-нің ұйымдастыруымен «Сенің ортаң» жобасы аясында Дулат Исабековтің танымал «Сүйекші» шығармасын талқылау өтті. Көпшілік назарына ұсынылған әдеби жиынға қала әкімінің орынбасары Сәрсен Абайұлы арнайы қатысып ұйым мүшелерімен еркін пікір алмасты.
Талқылауға «Оқырман»,«Ақиқат»,«Айқап» кітап клубтары және «Ізгілікте жарысайық» қайырымдылық қорының жастары қатысты. Ұйым мүшелері шығарманың әдеби маңызы мен оның қазіргі қоғамдағы өзектілігі туралы өз ойларын білдірді. Әсіресе,Дулат Исабековтің ерекше стилі мен терең философиялық ойларының қазақ әдебиетінің дамуына қосқан үлесін кеңінен қарастырды.
«Сенің ортаң» жобасы қазақ әдебиетінің үздік шығармаларын кеңірек таныту, сондай-ақ әдеби талқылаулар арқылы қоғамда мәдени диалогты дамыту мақсатында ұйымдастырылған. Бұл жоба әдебиет саласындағы маңызды мәселелерді көтеру арқылы оқырмандардың мәдени білімін арттыруды көздейді. Сондай-ақ қазақ әдебиетінің маңызды шығармаларын кең аудиторияға таныстыру арқылы қоғамдық пікірді қалыптастырады. Әр аптада орталық қатысушылары белгілі бір кітапты оқып, оның мазмұнын,тақырыбын және қоғамға тигізер әсерін талқылауды дәстүрге айналдырған. Онда әдебиетке деген қызығушылықтары артып, әдеби шығармаларға деген ерекше көзқарастары қалыптасқан.
Бұндай маңызы бар шаралар жастарға мәдениет пен өнерді насихаттап, рухани тәрбие беруге бағытталған.Алдағы уақыттада түрлі танымдық және шығармашылық бағыттағы шаралар жалғасын табады,-дейді ұйымдастырушылар.
Шара аясында қатысушылардың пікірлері мен ұсыныстары тыңдалды, сондай-ақ көрермендермен сұрақ-жауап сессиясы ұйымдастырылды. Оқырмандар мен әдебиет сүйер қауым шығарманың өзектілігін, оның әдебиеттегі орны мен қазақ қоғамындағы рөлін талқылауға белсенді қатысты.
