Атбасарда Жабай өзеніндегі су қауіпті деңгейден асып кетті. Әзірге судың жайылуы байқалмайды.
«Казгидромет» РМК Ақмола облысы бойынша филиалының мәліметінше, 2024 жылдың 8-ші сәуірі таңғы сағат 08:00-дегі жағдай бойынша Атбасарда Жабай өзеніндегі су қауіпті деңгейден 8 см асты (қауіпті деңгей — 710 см).
«Өзендегі судың деңгейі 12 сағат ішінде 26 см-ге көтерілді. Судың көтерілуіне өзенге еріген қар суының молынан құйылуы, сондай-ақ, гидрологиялық бекеттен мұздың еріп ағуы себеп болып отыр. Қазіргі кезде мұзды ұсату жұмыстары жүргізіліп жатыр. Мұз құбылыстарының әсерінен (мұз жұру, мұз кептелісі) су деңгейі көтеріліп, өзен жағасынан шығуы ықтимал. Су қауіпті деңгейден асса да жайылуы байқалмады» — делінген «Казгидромет» РМК Ақмола облысы бойынша филиалының мәліметінде.
Осы ретте, өзен суы қауіпті деңгейден асқан кезде өзен ағысы бойынша төмен орналасқан, сондай-ақ өзеннің жайылмалы учаскелерінде орналасқан елді мекендерді, шаруашылық құрылыстар мен жергілікті маңызы бар жолдарды су басу қаупі сақталады.
Сонымен бірге, Балкашин ауылында – Жабай өзенінің гидрологиялық бекетінде су деңгейінің көтерілуі байқалды (4 сағат ішінде 18 см). 7 сәуір сағат 16:00 жағдай бойынша су деңгейі – 95 см болды (қауіпті деңгей – 520 см). Калутон ауылында – Қалқұтан (Калутон) өзенінің гидрологиялық бекетінде су деңгейінің көтерілуі байқалды (4 сағат ішінде 5 см). 7 сәуір сағат 16:00 жағдай бойынша су деңгейі – 562 см болды (қауіпті деңгей – 630 см).
Журавлевка ауылында – Бақсұқ өзенінің гидрологиялық бекетінде су деңгейінің көтерілгені байқалды (4 сағат ішінде 5 см). 7 сәуір сағат 16:00 жағдай бойынша су деңгейі – 487 см болды (қауіпті деңгей — 690 см).
Жоғарыда аталған гидробекеттерде еріген қар және бүйірлік ағындардың келіп қосылуынан, мұз кептелісі құбылыстарының сақталуына байланысты су деңгейі одан әрі көтерілуі және қауіпті деңгейден асып кетуі мүмкін.
