Түркістанда қасиетті Рамазан құрметіне ел Президентінің ауызашары өтті. Игі шараға облыс әкімі Дархан Сатыбалды сондай-ақ аймақ тұрғындары, ақсақалдар алқасы, еңбек ардагерлері мен имамдар қатысты. Өңір басшысы жиналған қауымды Қасиетті Рамазан айымен құттықтап, ізгі ниетін жеткізді.
Биыл Рамазан айы Наурыз мерекесімен тұспа-тұс келіп отыр. Кеше еліміз бойынша «Көрісу күні – Амал мерекесі» атап өтілсе, бүгінгі күн қайырымдылыққа, ізгілікке бағытталып отыр. Президентіміздің атынан барлық өңірде ауызашар ұйымдастырылуда. Бұл Қасым-Жомарт Кемелұлының еліміздің мәдениеті мен дініне деген құрметі.
Рухани жиында ізгілікке жетелейтін уағыздар, өсиеттер айтылды. Қазақтың өнегелі термелері айтылып, жанға шуақ сыйлайтын дәстүрлі әндері шырқалды. Ел ағалары елді бірлікке бастайтын мағыналы ойларын айтып, өңір жұртшылығын Рамазан айымен құттықтады. Ас соңында Қазақстан мұсылмандар діни басқармасының Түркістан облысы бойынша өкіл имамы Ержан Төлепов құран бағыштады.
