«Қазақстан темір жолы» ұлттық компаниясы басқарма төрағасы Елжас Орыншиевтің ұсталуына қатысты ресми түсініктеме берді. Компания өкілдерінің мәлімдеуінше, орын алған жағдай Қазақстанның теміржол жүйесінің жұмысына әсер етпеген. Жолаушылар мен жүк тасымалы штаттық режимде жалғасып жатыр.
ҚТЖ-ның ресми хабарламасында пойыздар қозғалысы еш кедергісіз жүзеге асырылып жатқаны айтылған. Сондай-ақ компания қозғалыс қауіпсіздігі, пойыздар кестесінің сақталуы және клиенттер алдындағы міндеттемелердің орындалуы тұрақты бақылауда екенін атап өтті.
Осылайша, ұлттық компания қалыптасқан жағдайға қарамастан, жолаушылар, жүк жөнелтушілер және іскер серіктестер алдындағы міндеттемелерін орындауды жалғастыратынына сендірді.
Бұған дейін «Самұрық-Қазына» қоры да осындай мәлімдеме жасаған болатын. Қор қаржылық және институционалдық тұрақтылық сақталғанын, сондай-ақ инвесторлар, кредиторлар мен халықаралық серіктестер алдындағы барлық міндеттемелер орындалатынын хабарлады.
Еске салайық, 12 қарашада Қазақстанның Ұлттық қауіпсіздік комитеті «Самұрық-Қазына» қорының басқарма төрағасы Нұрлан Жақұповтың, ҚТЖ басшысы Елжас Орыншиевтің және басқа да бірқатар тұлғаның ұсталғанын растады. Қолда бар ақпаратқа сәйкес, олар сыбайлас жемқорлық сипатындағы қылмысты жасады деген күдікке ілінген. Алайда тергеу мән-жайлары мен ұсталған әр адамның іске қатысы туралы ресми ақпарат әзірге жарияланған жоқ.
Бұл оқиға ұлттық теміржол тасымалдаушысының алдағы жоспарларына қатысты да бірқатар сұрақ туындатты. Атап айтқанда, QAMS қауымдастығының атқарушы директоры Данияр Темірбаев ҚТЖ акцияларын бастапқы жария орналастыру (IPO) мерзімі белгісіз уақытқа шегерілуі мүмкін деген болжам айтты.
Ал 13 қарашада Қазақстан Президенті Қасым-Жомарт Тоқаев көлік-логистика саласын дамыту мәселелеріне арналған Қауіпсіздік Кеңесінің шұғыл отырысын өткізуді тапсырды. Мемлекет басшысының баспасөз хатшысы Айбек Смадияровтың хабарлауынша, Президент екі ұлттық компания басшыларының ұсталуына байланысты мемлекеттің нақты ұстанымын білдірмек.
Қазіргі уақытта ҚТЖ мен «Самұрық-Қазына» төңірегіндегі жағдай қоғам мен іскерлік орта назарында. Ендігі кезекте мемлекеттік органдардың ресми шешімдері, тергеу нәтижелері және ұлттық компанияларды басқару жүйесінің ашықтығын қамтамасыз ету бағытындағы алдағы қадамдар маңызды болмақ.
