Жапонияның Осака қаласында өтіп жатқан «EXPO 2025» көрмесінде Қазақстан павильоны миллионыншы қонағын қабылдады. Бұл мәртебе жапондық Косуке Хасегаваға бұйырып, оған арнайы құрмет көрсетілді. Ол павильонның заманауи дизайны мен цифрлық шешімдеріне тәнті болып, Қазақстанға баруға қызығушылық білдірді.
Қазақстан павильоны көрмеде ең танымалдардың бірі саналады. Мұнда елдің цифрландыру, экология, туризм, инновация және «жасыл» энергетикадағы жетістіктері көрсетілген. Халықаралық көрмелер бюросының Бас хатшысы Димитри Керкентзес те арнайы келіп, экспозицияның жоғары деңгейде ұйымдастырылғанын атап өтті. Көрме 13 қазанға дейін жалғасады, оған 160 мемлекет пен 9 халықаралық ұйым қатысуда.
