Жазушы, драматург Әкім Тарази 92 жасқа қараған шағында дүниеден өтті. Мемлекет басшысы жазушы, Қазақстанның Еңбек Ері Әкім Таразидің дүниеден өтуіне байланысты көңіл айту жеделхатын жолдады.
Қасым-Жомарт Тоқаев аса көрнекті жазушы, драматург, Қазақстанның Еңбек Ері Әкім Таразидің қайтыс болуына байланысты оның жұбайы, Мемлекеттік сыйлықтың иегері Роза Мұқанова мен балаларына көңіл айтты. Әкім Тарази бүкіл саналы ғұмырын сөз өнеріне арнаған, төл әдебиетіміз бен мәдениетімізді төрге оздырған ұлтымыздың біртуар перзенті еді. Дарынды қаламгер қазақ прозасының көкжиегін кеңейтті, ұлттық кино және драматургия саласына өлшеусіз үлес қосты. Асыл мұратынан ешқашан айнымаған қалам иесін көзі қарақты оқырман «Әдебиет әлемінің Әкімі» деп ардақ тұтты, зиялы қауым оның шығармашылығымен қатар адамгершілік қасиеттерін ерекше бағалады. Өнегелі өмір сүріп, соңына мол мұра қалдырған Әкім Таразидің жарқын бейнесі халқымыздың жүрегінде мәңгі сақталады, – делінген жеделхатта. Айта кетейік, Әкім Тарази 1933 жылы 9 қыркүйекте Алматы қаласында дүниеге келген. Ал орта мектепті Жамбыл облысындағы Жаңа тұрмыс ауылында тәмамдаған. 1957 жылы Абай атындағы Мемлекеттік педагогикалық институтының филология факультетін аяқтағаннан кейін екі жылдай өзі оқыған мектепте орыс тілі және әдебиеті пәнінің мұғалімі болып жұмыс істеді. Ал 1960 жылы Мәскеу қаласына барып, Жоғары сценарлық курсқа түсті. Әкім Таразидің көптеген туындылары орыс, қытай, поляк, болгар және ағылшын тілдеріне аударылды. Драматургиялық шығармалары еліміздің театр сахналарында қойылды. Ал сценарийлері бойынша түсірілген «Тұлпардың ізі», «Арман – атаман», «Қараш-Қараш оқиғасы», «Мұстафа Шоқай», «Қызжылаған» фильмдері қазақ киносының алтын қорына енді.
