Биыл Ұлы жеңістің 80 жылдығы кең көлемде тойлануда. Бұл күн – тек өткеннің тарихы ғана емес, бүгінгі бейбіт өмірдің бастауы, елдік пен ерліктің мәңгілік үлгісі. Осыған орай еліміз бойынша түрлі деңгейде мерекелік, тағылымдық іс-шаралар өткізілуде. Шымкент қаласында да бұл атаулы дата ескерусіз қалған жоқ.Шымкент қалалық музейлер бірлестігі мен қалалық Полиция департаментінің бірлесуімен “Ешкім, ешқашан ұмытылмайды” атты патриоттық бағыттағы іс-шара ұйымдастырылды.
Іс-шара аясында соғыс жылдарының естеліктері, майдан даласындағы ерліктер мен тылдағы еңбеккерлердің жанкешті еңбегі жайлы жан-жақты мағлұматтар берілді. Көрмелер ұйымдастырылып, тарихи деректер мен сирек кездесетін мұрағаттық материалдар жұртшылық назарына ұсынылды.
Аталған іс-шараға 6698 әскери бөлімінің жеке құрамындағы сарбаздар қатысты. Олар үшін бұл кездесудің тәрбиелік мәні зор болды. Батырлардың ерлігіне тағзым етіп, олардың ерлік жолымен танысу – жас ұрпақтың бойында патриоттық сезімді оятатыны сөзсіз. Сондай-ақ жиында жеңіс жолындағы жылдардың тауқыметі мен елдің бірлігі, батырлардың жанқиярлығы сөз болды.
Тарих – ұрпақ сабақтастығының алтын көпірі. Ұйымдастырушылардың айтуынша, мұндай шаралар тарихи жадыны жаңғыртып қана қоймай, ел қорғаны болар жастардың рухын көтереді.
