Орал қаласында зергерлік бұйымды тонады деген күдікпен ер адам ұсталды, — деп хабарлайды Polisia.kz. Полиция қызметкерлері ломбардтан алтын алқаны ашық түрде ұрлады деген күдікпен Бәйтерек ауданының 28 жастағы тұрғынын ұстады.
Күні кеше полицияға қаладағы ломбардтардың бірінің қызметкерлерінен қоңырау түсіп, белгісіз ер адамның сатып алушы ретінде кіріп, зергерлік бұйымды иемденіп кеткені хабарланды. Ломбард қызметкері оған алтын алқаны көрсеткен кезде, күдікті оны жұлып алып, қашып кеткен. Оқиға орнына жедел-тергеу тобы дереу жетті. Жедел-іздестіру шаралары барысында күдікті «ізін суытпай» анықталып, ұсталды. Тергеу барысында оның бұрын қылмыстық жауапкершілікке тартылғаны белгілі болды. Қазіргі уақытта күдіктіге қатысты тонау бабы бойынша қылмыстық іс қозғалды. Ол уақытша ұстау изоляторына қамалды, тергеу амалдары жүргізіліп жатыр.
