Бүгін Аманат партиясының депутаттары Әл-Фараби ауданының тұрғындарымен кездесті. Қоғамдық қабылдау барысында тұрғындар бірқатар мәселелерді көтерді. Олардың басым көпшілігі жер, су сондай-ақ жарық, тұрғын-үй мәселелерімен келген.
Тұрсынай Барлыбаева Әл-фараби ауданының тұрғыны. Аталған қабылдауға жер мәселесі бойынша келген. Оның айтуынша мемлекеттен берілген жер телімінің құжаттары заңсыз деп көрсетілген. Тұрғындар бұл мәселе бойынша құзырлы органдарға да шағым түсірген. Алайда ешқайсысы нақты жауап бермеген. Тиісті мекемелерден нақты жауап болмаған соң депутаттардың қабылдауына келгенін айтады.
Аталған мәселе бойынша халық қалаулылары тұрғындарға тиісті жауаптарын берді. Айтуларынша бұл мәселеге байланысты салаға жауаптыларға депутаттық сауал жолдап, бірнеше күн ішінде нақты жауап бере алатынын жеткізді. Алайда депутат жердің құжаттарын заңдастыру аз уақытта шешілетін жұмыс емес екенін атап өтті.
Айта кетейік көшпелі қабылдау тұрғындардың өмір сүру сапасын жақсартуға сондай-ақ маңызды мәселелерін шешуге бағытталған. Депутаттармен кездесуге келген азаматтар өз шағымдарын айтып тиісті жауаптарын алды. Халық қалаулылары тұрғындардың талап-тілегін тыңдап, терең талқылады. Сондай-ақ, келіп түскен өтініштер ескерусіз қалмай, құзырлы мемлекеттік органдарға жөнелтілетінін айтты.
