Бүгін қоғамда қызу талқыға түскен “Су ресурстары – Маркетинг” ЖШС-ін мемлекет меншігіне қайтаруды талап етеміз” тақырыбындағы петиция бойынша жария тыңдау өтті. Іс-шараға мемлекеттік органдардың өкілдері, қоғамдық ұйым мүшелері, салалық сарапшылар және қала тұрғындары қатысты. Тыңдаудың негізгі мақсаты – тұрғындардың ұсыныстарын тыңдап, аталмыш мәселенің құқықтық, экономикалық және әлеуметтік жақтарын жан-жақты талқылау.
Петиция жақында әлеуметтік желілер мен арнайы платформалар арқылы қоғам назарына ұсынылды. Оның бастамашылары “Су ресурстары – Маркетинг” ЖШС-нің жекеменшік статусы қала тұрғындарының мүдделеріне кері әсер етеді деп санайды. Олар компанияның мемлекет меншігіне қайтарылуы су тарифтерін тұрақтандырып, қызмет көрсету сапасын арттыруға мүмкіндік береді деп сенеді. Тыңдауға жиналғандар компанияның тарифтік саясатын, техникалық қызмет сапасын, сумен қамту инфрақұрылымының жағдайын талқылады. Көптеген тұрғындар судың қолжетімділігі мен сапасына қатысты шағымдарын ортаға салды.
Жиында белгілі боғандай, «Су ресурстары» маркетинг ЖШС-не қатысты халық арасында шағым көп. Тарифтің қамбаттығы, су тазартқыш құбырлардың жүргізілмеуі халық наразылығын тудырған. Алайда монополист бұл шешімдермен келіспейді.
Белсенділердің айтуынша, соңғы жылдары компания тарапынан көрсетілетін қызмет сапасы төмендеген, ал тарифтер өсіп жатыр. Олардың пікірінше, компания мемлекет қарамағына өтсе, бұл мәселе шешілуі мүмкін. Тұрғындардың көбі мемлекет меншігіне қайтаруды қолдайтынын білдірді. Олар үшін басты мәселе – тарифтердің үнемі өсуі мен қызмет сапасының төмендігі. Сонымен қатар, қатысушылардың кейбірі тыңдаудың нәтижесін тек қағаз жүзінде қалып қоймауы үшін биліктен нақты әрекеттер күтетінін айтты.
