Мегаполистың әлеуетін жақсартуға бағытталған жоба ұсынған жас еріктілер марапатталды. 1 миллиондық грант ұтқан жастар түрлі бағытта тың идеялар мен жаңа жобалар ұсынып, конкурс жеңімпазы атанды. Аталған жоба қалалық ішкі саясат және жастар істері жөніндегі басқармасының ұйымдастыруымен өтті. Толығырақ алдағы сюжетте.
Бақытжан Тұрысбек жас ерікті. Аталған конкурсқа өзінің жобасын ұсынған волонтердың жұмысы сайыста үздік деп танылып, грантқа қол жеткізді. Таза Қазақстан акциясының аясында Таза Шымқала атты экологиялық жоба ұсынған жас қаражатты игі істерді дамытуға жұмсайтынын жеткізді. Қоқыс жинамасаң да, қоқыс тастама атты лозунгпен ұсынылған жоба шаһардың тазалығын қамтамасыз етуге бағытталған.
Жалпы ерікті болу үлкен жауапкершілікті талап етеді. Ұсынылған жобалар дұрыс бағытта игерілуі тиіс. Сол себепті тыңғылықты жұмыс жасау керек. Осылай деген қалалық ішкі саясат және жастар істері жөніндегі басқарма басшысының орынбасары Заңғарбек Нышанбекұлы жастар үшін жасалынып жатқан мүмкіндіктердің көп екенін алға тартады.
Бүгінде волонтерлік халықтың шынайы болмысы мен ізгіліктің белгісіне айналды. Көбіне жастардың айналысатын ісі десек, қазір игілікті істі жасауға орта буын өкілдері де ден қойған. Қалалық деңгейде ұйымдастырылып жатқан шараның орны ерек.
Айта кетейік, жас волонтер жобасы еріктілер қозғалысын дамытуға және қолдауға елеулі үлес қосқан отандық волонтерлерді көтермелеуге сондай-ақ ынталандыруға бағытталған.
