Қазақстанда банк пен микроқаржы ұйымдарының кепілінде тұрған автокөліктерді шетелге заңсыз шығару схемасына қатысы бар деген күдікке ілінген топтың әрекеті тоқтатылды. Тергеудің алдын ала мәліметтері бойынша, кейіннен қайта сату мақсатында ел аумағынан 56 автокөлік шығарылған болуы мүмкін.
Істің мән-жайы туралы 12 қарашада Қазақстан Республикасының Ішкі істер министрлігі хабарлады.
Тергеу нұсқасына сәйкес, күдіктілер банктер мен микроқаржы ұйымдары арқылы автокөліктерді жалған тұлғалардың атына кепілге рәсімдеген. Кейін қаржы ұйымдарының алдындағы кепілдік міндеттемелер сақталғанына қарамастан, көліктер Қазақстан аумағынан заңсыз шығарылған.
Құқыққа қайшы әрекеттердің жолын кесу мақсатында құқық қорғау органдары еліміздің бірден он өңірінде арнайы операция жүргізді. Операция барысында полиция бөлімшелеріне 48 адам жеткізілді. Схеманы ұйымдастырды деген күдікке ілінген алты адам ұсталып, уақытша ұстау изоляторына қамалды.
Қазіргі уақытта тергеу және жедел-іздестіру шаралары жалғасуда. Құқық қорғау органдары оқиғаның барлық мән-жайын, ықтимал сыбайластарды және автокөліктерді шетелге шығару арналдарын анықтап жатыр. Елден шығарылған көліктерге іздеу жарияланды.
Ішкі істер министрлігі азаматтарды автокөлік сатып алу және сату кезінде мұқият болуға шақырды. Әсіресе көлікті бөгде адамның атына рәсімдеу, күмәнді ұсыныстар немесе қысқа мерзімде пайда табуға уәде беретін мәмілелерге сақтықпен қарау қажеттігі ескертілді.
Министрлік «Заң мен тәртіп» тұжырымдамасы аясында құқық бұзушылықтардың алдын алудың маңыздылығын да атап өтті. Азаматтарға автокөліктің заңдық тазалығын тексеріп, күмәнді қаржылық схемаларға қатыспау ұсынылады.
Қазіргі уақытта тергеу жалғасуда. Іске қатысы бар барлық тұлғаның әрекетіне түпкілікті құқықтық баға тергеу нәтижелері мен сот талқылауынан кейін беріледі.
