2026 жылғы 12 қарашада Қазақстан Республикасының Ұлттық қауіпсіздік комитеті «Самұрық-Қазына» ұлттық әл-ауқат қоры» АҚ мен «Қазақстан темір жолы» ҰК» АҚ басшыларына қатысты жүргізіліп жатқан тергеу туралы ресми ақпарат таратты. Ведомство мәліметінше, екі ұйымның басқарма төрағалары сыбайлас жемқорлыққа қатысты күдікпен ұсталған. Бұл туралы HAN TV хабарлайды.
ҰҚК-нің хабарлауынша, арнайы қызметтің Сыбайлас жемқорлыққа қарсы іс-қимыл қызметі 2026 жылғы 11 қарашада бірқатар адамды қамауға алған. Олардың қатарында «Самұрық-Қазына» АҚ басқарма төрағасы Нұрлан Жақыпов пен «Қазақстан темір жолы» ҰК» АҚ басқарма төрағасы Елжас Отыншиев бар.
Қазіргі уақытта құзырлы органдар оқиғаның мән-жайын жан-жақты зерделеп, қажетті тергеу шараларын жүргізуде. Тергеу мүддесіне байланысты істің басқа да деректері әзірге жарияланбайды. ҰҚК бұл шектеудің Қазақстан Республикасы Қылмыстық-процестік кодексінің 201-бабына сәйкес енгізілгенін атап өтті.
Комитеттің мәлімдеуінше, ел басшылығы жүктеген міндеттерді орындау және «Заң және тәртіп» тұжырымдамасын жүзеге асыру шеңберінде жемқорлыққа қарсы іс-қимыл бағытындағы жұмыстар жалғасын табады.
Нұрлан Жақыповтың еңбек жолы
«Самұрық-Қазына» қорының басшылығына Нұрлан Жақыпов 2023 жылғы 3 сәуірде келген. Ол бұл қызметке тағайындалғанға дейін инвестициялық және қаржы секторында, сондай-ақ ірі ұлттық компаниялар мен халықаралық ұйымдарда түрлі жауапты лауазымдарды атқарған.
Нұрлан Жақыпов 1978 жылғы 31 наурызда дүниеге келген. Жоғары білімді Ресейдің Мәскеу қаласындағы Сыртқы істер министрлігіне қарасты Мәскеу мемлекеттік халықаралық қатынастар институтында алған. 1996–2001 жылдары халықаралық экономикалық қатынастар факультетінде білім алған маман экономика бакалавры және магистрі дәрежелеріне ие. Сонымен қатар экономика ғылымдарының кандидаты.
Кәсіби қызметін 2001 жылы Еуразиялық өнеркәсіп қауымдастығында қаржы талдаушысы ретінде бастаған. 2003–2016 жылдар аралығында оның еңбек жолы халықаралық қаржы институттары мен өндірістік компаниялардағы қызметтермен байланысты болды.
Атап айтқанда, Замбияның Китве қаласындағы Chambishi Metals PLC компаниясында бизнес-менеджер, Research, Investment and Development Ltd ұйымында жоба менеджері болып жұмыс істеген. Кейін Credit Suisse компаниясының базалық материалдар жөніндегі тобында биржада саудаланатын компаниялардың акцияларын бағалау және талдау саласында қызмет атқарды.
Одан кейін «Тау-Кен Самұрық» ұлттық тау-кен компаниясында басқарушы директор әрі басқарма мүшесі болды. Сондай-ақ RBS-тің Қазақстандағы еншілес банкінде инвестициялық банкинг департаментін басқарды және Астанадағы өкілдік жұмысына жетекшілік етті. Бұдан бөлек, UBS AG компаниясының Алматыдағы өкілдігінде инвестициялық банкинг департаментінің атқарушы директоры қызметін атқарып, елордадағы өкілдігін басқарған.
2016–2017 жылдары Жақыпов «Қазатомөнеркәсіп» ҰАК» АҚ-да даму және инвестициялар жөніндегі басқарушы директор әрі басқарма мүшесі болды. 2017–2019 жылдары «Астана» әлеуметтік-кәсіпкерлік корпорациясын басқарды. Ал 2019–2020 жылдары Rothschild & Co компаниясының Қазақстандағы өкілі қызметін атқарды.
2020 жылдан бастап «Kazakhstan Investment Development Fund (KIDF) Management Company» Ltd компаниясының басқарма төрағасы болды. Кейін, 2023 жылдың сәуірінде, «Самұрық-Қазына» ұлттық әл-ауқат қорының басшылығына тағайындалды.
Елжас Отыншиев туралы не белгілі?
«Қазақстан темір жолы» ұлттық компаниясының басқарма төрағасы Елжас Отыншиев бұл лауазымға 2026 жылғы 20 шілдеде тағайындалған. Яғни ол компанияны басқаруға бірнеше ай бұрын ғана кіріскен.
Отыншиев Мәскеу физика-техникалық институтында білім алған. Аталған оқу орнында «Жалпы және қолданбалы физика» мамандығы бойынша бакалавриат пен магистратураны тәмамдаған.
Еңбек жолының алғашқы кезеңі халықаралық консалтинг саласымен байланысты. 2007 жылы ол Ernst & Young компаниясының Мәскеудегі кеңсесіне жұмысқа орналасып, бизнесті бағалау және мәмілелерді сүйемелдеу департаментінде кеңесші қызметін атқарды.
2009–2019 жылдары «Самұрық-Қазына» қорының орталық құрылымында және оған қарасты еншілес ұйымдарда түрлі лауазымдарда жұмыс істеді.
2021–2023 жылдары Kazakhstan Investment Development Fund (KIDF) ұйымында басшылық қызметтер атқарып, инвестициялық портфельді басқару жұмыстарына жетекшілік етті.
2023 жылғы сәуірде «Самұрық-Қазына» АҚ-ның стратегия және активтерді басқару жөніндегі басқарушы директоры әрі басқарма мүшесі болып тағайындалды. Бұл қызметте қор портфеліне кіретін мұнай-газ, теміржол, тау-кен және өзге де экономикалық секторлардағы компаниялардың активтерін басқару мәселелеріне жауапты болды.
Сонымен қатар 2024 жылғы ақпаннан бері «Қазақстан темір жолы» ҰК» АҚ директорлар кеңесінің мүшесі болып келеді.
Еңбегі мемлекеттік деңгейде де атап өтілген. 2023 жылы Елжас Отыншиев Қазақстан Республикасының «Ерен еңбегі үшін» медалімен марапатталған.
Қазіргі таңда екі ұлттық компанияның басшыларына қатысты тергеу жалғасып жатыр. Әзірге құқық қорғау органдары күдіктердің нақты мазмұны мен іс бойынша өзге де мәліметтерді жариялаған жоқ.
