Қай қоғамның даму деңгейін бағаласақ та, ең алдымен оның білім беру жүйесіне, ұстаз еңбегіне назар аударамыз. Өйткені мектептің жүрегі – ұстаз, ал ұстаздың беделі – сол мектептің абыройы мен беделінің ең негізгі көрсеткіші. Ұстаздың сөзі – тәрбие, әрекеті – үлгі, талабы – тәртіп, мейірімі – бала жүрегіне жол табар шырақ.
Ұстаз беделі бір күнде қалыптаспайды, ол үлкен жауапкершілікпен, кәсіби біліктілікпен, үздіксіз ізденіспен және адамдық парасатпен бекітіледі. Сабақтағы әдіс-тәсіл, оқушыны түсіне білу, ата-анамен дұрыс қарым-қатынас орнату, әріптестерімен сыйластық – мұның бәрі ұстаздың жеке бейнесін қалыптастырады. Сол бейне арқылы бүтін мектептің тәрбиелік деңгейі, оқыту сапасы бағаланады.
Қазіргі заман мұғалімі тек пәнді меңгерген маман ғана емес, ол – баланың жан дүниесін түсінетін психолог, бағыт-бағдар беретін тәлімгер, жаңашылдықты қабылдайтын көшбасшы. Мектептің даму стратегиясы ұстаздың кәсіби шеберлігіне, ғылым мен техника өзгерістерін игере білуіне, жаңа технологияны тиімді қолдануына тікелей байланысты. Сондықтан ұстаз қандай болса – мектеп те сондай.
Мектеп абыройын асқақтататын да, оның атын шығаратын да – ұстаздың еңбегі. Оқушылардың олимпиададағы жетістігі, тәртіптің сақталуы, мектеп ішіндегі мәдениет, ата-ананың сенімі – бәрі ұстаз беделінен бастау алады. Ұстаз қадірлі болған жерде оқушы да, ата-ана да мектепке құрметпен қарайды. Демек, ұстаздың мәртебесі – білім ошағының айнасы ғана емес, ұлттың ертеңіне салынған инвестиция.
Сондықтан мектеп әкімшілігінің басты міндеті – ұстазға қолайлы жағдай жасау, кәсіби дамуына мүмкіндік беру, еңбегін әділ бағалау. Ұстаздың беделі көтерілген жерде мектептің абыройы артып, білім сапасы жоғарылайды. Осы жолда әрбір ұстаздың еңбегі – баға жетпес, ал олардың беделі – мектептің ең үлкен байлығы.
Қорытындылай келе, ұстаз беделін құрметтеу – мектептің абыройын асқақтату, келешек ұрпақтың болашағына жол ашу. Ұстаздың әрбір еңбегі – елдің ертеңіне қосылған үлес, ал оның беделі – күллі қоғамның қадірлейтін құндылығы.
№55 Жеңістің 50 жылдығы ЖББМ КММ-нің директоры: Умиралиев Қазыбек Абуталипович
