Шымкент қалалық мәдениет, тілдерді дамыту және архивтер басқармасының Абай атындағы орталықтандырылған көпшілік кітапханалар жүйесінің ұйымдастыруымен Абай музейінде қазақтың ұлы ақыны, ойшылы Абай Құнанбаевтың 180 жылдық мерейтойына арналған «Абайдың асыл мұрасы» атты тағылымды іс-шара өтті.Рухани кешке әдебиет сүйер қауым, студенттер мен мектеп оқушылары, кітапханашылар мен өнерпаздар жиналып, дана ақынның мұрасын тағы бір мәрте дәріптеді.
Іс-шараға қатысушылар Абай мұрасының қазақ руханиятындағы маңызы туралы пікір алмасып, оның еңбектерін бүгінгі заман тұрғысынан саралады. Ақын шығармаларының мәңгілік құндылығы, терең философиясы мен адамзатқа ортақ мұраттары ерекше аталып өтті.
Іс-шараға қатысқан әдебиет сүйер қауым Абай өлеңдерінің терең мағынасы мен бүгінгі күнге дейін өзектілігін жоғалтпағанын атап өтті. Ақын жырларындағы білім мен ғылымға ұмтылу, адамгершілік пен әділдік, еңбекқорлық пен тәрбие тақырыптары бүгінгі заманда да аса маңызды екені сөз болды.
Осындай игі бастамалар арқылы өскелең ұрпақ Абайдың өнегелі жолына, оның асыл мұрасына тағы бір қадам жақындай түсетіні сөзсіз. Ақынның қара сөздері мен философиялық толғаулары бүгінгі таңда да әрбір азаматқа рухани азық бола алатыны, оның мұрасы мәңгілік екені жиын барысында кеңінен талқыланды.
