Сайрам-Өгем мемлекеттік ұлттық табиғи паркі ұйымдастырған «Парктер шеруі-2025» табиғатты қорғау акциясы аясында Кеңес Одағының Батыры генерал-майор Сабыр Рахымов атындағы әскери колледждің аумағында «Табиғатты аялайық – болашақты ойлайық» ұранымен 80 көшет отырғызып, көгалдандыру іс-шарасын өткізді.
Табиғатты қорғау акциясы салтанатты митингіден бастау алды. Онда «Сайрам-Өгем мемлекеттік ұлттық табиғи паркінің» Бас директоры Сағадат Нұржігітов осындай бастаманың маңыздылығы туралы айтып, Әскери колледж ұжымына қоршаған ортаны қорғаудағы белсенді ұстанымы үшін алғысын білдірді. Кеңес Одағының Батыры генерал-майор Сабыр Рахымов атындағы әскери колледждің бастығы, полковник Мақсат Ахшалов атап өткендей, ағаш отырғызу балаларға қоршаған ортаға қамқор болуды үйретеді, табиғи байлықты сақтауға және оны көбейтуге шақырады.
Салтанатты бөлімнен кейін колледж тәрбиеленушілері, офицерлер мен оқытушылар саябақ қызметкерлерімен бірге ағаш отырғызуға кірісті. Олар мектеп аумағында және мектеп маңында ағаш көшеттерін отырғызды. Ағаш отырғызу кезінде саябақтың өкілдері акцияға қатысушыларға ағаш отырғызуды қалай дұрыс жүргізу керектігін түсіндірді. Жалпы алғанда 20 дана боз арша, 20 дана жеміс және 40 дана жалпақ жапырақты ағаштар отырғызылды.
Экоакция соңында мектеп тәрбиеленушілері ұлттық саябақ қызметкерлеріне отырғызылған ағаштарға күтім жасаймыз деп уәде берді.
