«AMANAT» партиясы жанындағы Сыбайлас жемқорлыққа қарсы іс-қимыл жөніндегі Республикалық кеңесі сәуір айында Шымкент қаласында көшпелі отырысын өткізуді жоспарлап отыр. Осыған байланысты партияның қалалық филиалында арнайы жиын ұйымдастырылды. Басқосуға «AMANAT» партиясының Орталық аппаратының партиялық бақылау департаментінің инспекторы Венера Есілбаева, партияның қалалық филиалы Атқарушы хатшысының орынбасары Ербол Байқонысов, партия филиалы жанындағы Сыбайлас жемқорлыққа қарсы іс-қимыл жөніндегі қоғамдық кеңестің төрағасы Берген Ержаппар, партия филиалы жанындағы Партиялық бақылау комиссиясы төрағасының орынбасары Бақытжан Жақсықұлов және өзге де партия филиалдарының қызметкерлері, бірқатар қалалық бақылау мекемелерімен, қалалық әкім аппараты мен Экономика және бюджеттік жоспарлау басқармасының басшы құрамы қатысты
Жиында Шымкент қаласындағы сыбайлас жемқорлыққа қарсы іс-қимыл мәселелері талқыланды. Сонымен қатар, партияның Сайлауалды бағдарламасының орындалу барысы да кеңінен қаралды. Венера Есілбаева жиын қатысушыларына көтерілген мәселелер бойынша жан-жақты зерделеу жұмыстарын жүргізуді тапсырды. Ол алдағы уақытта өтетін Сыбайлас жемқорлыққа қарсы іс-қимыл жөніндегі Республикалық кеңестің көшпелі отырысына дайын болуға шақырды.
Шымкент қаласы үшін бұл отырыс сыбайлас жемқорлыққа қарсы күрестің жаңа мүмкіндіктері мен стратегияларын анықтауға бағытталған маңызды шара болмақ. Партия өкілдері мен бақылау органдары бірлесіп, қаладағы жемқорлық деңгейін төмендету және тиімді бақылауды қамтамасыз ету мақсатында жүйелі жұмыстар жүргізуді жалғастырады.
#AMANAT
