Алғыс айту күні – бұл ең алдымен елімізде тыныштық пен үндестіктің, өзара сенімділік пен барлық қазақстандықтарға деген құрметтің орнығуына негіз болған бейбітшілік пен келісім саясатының салтанаты күні. Күрделі заманды иық тіресе бірге еңсеріп, қысқа мерзім ішінде тәуелсіз Қазақстанды құру жолында аянбай тер төккен еліміздің барлық азаматттарының бір-біріне құрмет білдіретін айтулы күні мен Қазақстан Халқы Ассамблеясының 30 жылдық мерекесін жетісайлық жұртшылық жоғары деңгейде атап өтті.
Көптеген ұлттар мен этнос өкілдерінің бір-біріне ілтипат білдіріп, ырысты арттыратын, ынтымағын нығайта түсуі мақсатындағы мерекеге арналған салтанатты жиынға аудан ел ағалары мен этно-мәдени бірлестіктердің, қоғамдық ұйым төрағалары, аудан тұрғындары қатысты.
Өзге ұлт өкілдері елдегі жүргізіліп отырған салиқалы саясаттың нәтижесінде кезінде түрлі тағдыр тәлкегімен келген ұлттар мен этнос өкілдерін бауырына басып, өзектен теппей қамқорлық көрсеткені үшін қазақ халқына шынайы алғысын білдірді.Өйткені, қиын-қыстау заманда өзгенің басына түскен ауыртпалықты қайыспай бірге көтеріп, бүгінгі таңда еліміздегі түрлі ұлт өкілдерінің арасындағы адамгершілік қарым-қатынастың өнегелі өлшемін көрсете білген қазақ жерінде түрлі этнос өкілдерінің тұрақты түрде жұмыс жасайтын мәдени орталықтары ашылып, өз тарихы мен мәдениетін, тілі мен дінін оқып-тануларына барлық жағдай жасалған.
Мерекелік іс-шара барысында аудан тұрғындары Мырзашөл даласының кешегісі мен бүгінгісін, тәуелсіз Қазақстан елінің қол жеткізген жетістіктерін айтып, осынау бейбіт заманның негізін қалаған азаматтарға өз алғыстарын білдірді. Өскелең ұрпаққа жақсы менен жаманның аражігін ажырататын өсиетті ақыл-кеңестерін берді.
Тағдыр тоғыстырған Қазақстанның көпэтносты халқының ортақ тарихын құрметтеу мерекесін жоғары деңгейде атап өтуде аудандық мәдениет үйінің өнерпаздары да өз үлестерін қосып әсем әннен шашу шашып, тамаша билерін ұсынды. Сонымен қатар, қазыналы қарттарын құрметтеп, қашан да болса ақыл-кеңестерінің құндылығын қадірлей білетін жұртшылық бір-біріне құрмет көрсетті. Бірқатар азаматтар алғыс хаттармен марапатталып, елдегі ұлтаралық татулық пен саяси тұрақтылықтың сақталуын, қайғысыз күннің түгемеуін тілеп, бата жасасты.
