Ұлы Отан соғысындағы Жеңістің 80 жылдығына дайындалу және оны мерекелеу үшін облыстық іс-шаралар жоспары бекітілді. Жұмыстарды үйлестіру үшін арнайы жұмыс тобы құрылды.Түркістан облысының әкімі Нұралхан Көшеровтің төрағалығымен өткен аппараттың апталық мәжілісінде Жеңістің 80 жылдығын атап өту бойынша іс-шара жоспары кеңінен талқыланып, атқарылатын жұмыстар пысықталды.
Дүниежүзілік соғыс ардагерлерінің тізімі жасақталды. Жеңістің 80 жылдығы аясында облыста ауқымды іс-шаралар өткізу көзделіп отыр. Атап айтқанда, батырлардың есімдерін насихаттау мақсатында түрлі конкурстар, экскурсиялар, ғылыми-практикалық конференциялар, «Жас Ұлан» әскери-спорттық ойындары, бұқаралық спорттық шаралар, әскерлердің шеруі өткізіліп, мерекелік концерттер, тақырыптық кино кештері, архив құжаттары топтамасынан көрме, кездесулер ұйымдастыру жоспарлануда.
Облыстық цифрландыру, мемлекеттік қызметтер көрсету және архивтер басқармасының басшысы Марат Айнабеков байланыс орталығында атқарылған жұмыстар туралы есеп беріп, алдағы жоспарларды баяндады. Оның айтуынша, Мемлекет басшысы Қасым-Жомарт Тоқаевтың «Халық үніне құлақ асатын мемлекет» тұжырымдамасын іске асыру мақсатында Түркістан облысында 109 бірыңғай байланыс орталығы тәулік бойы тұрғындардан түсетін қоңырауларды қабылдайды.
