Түркістан облысының әкімі Нұралхан Көшеров «Отырар» секторында тұрғындармен кездесіп, ұсыныстары мен пікірлерін тыңдады. Шаһарда жүзеге асатын инфрақұрылымдық жұмыстар туралы айтты. Сонымен қатар өңір басшысы қаланың ішкі көшелерін жөндеу жобаларымен танысты. Өңір басшысы шаһарды аралап, жөндеу жұмыстары жүретін көшелерді көрді. Қала әкімі Әзімбек Пазылбекұлы мен жауапты басшылар құрылысы жүріп жатқан және енді басталатын жобалар туралы баяндады.
Кездесуде шаһар тұрғындары Түркістанда атқарылып жатқан жұмыстарға оң бағаларын беріп, жобаларға қолдау білдірді. Облыс әкіміне Түркістан қаласында инфрақұрылымды жақсартуға бағытталған жұмыстар жоспары мен жобалар таныстырылды. Оның ішінде «Отырар» секторы бойынша 24,6 шақырымды құрайтын 28 көшені жөндеу жоспарланған. Сондай-ақ өңір басшысы қаланың Ә.Жангелдин көшесіне барып, осында салынуы жоспарланған көпірдің жобасын көрді. Көпірдің ұзындығы 1,02 шақырым болса, жолдың ені – 14 метр болады деп жоспарланған. Облыс әкімі құрылыс жұмыстарын сапалы атқаруды, әрбір мердігердің жұмысын қадағалауды тапсырды. Сонымен бірге қаланың дамуына оң серпін беретін жобаларға басымдық беру керектігін айтты.
2018 жылы Түркістанды кәріз жүйесімен қамту көрсеткіші 15,8 пайыз болса, бүгінде 36,5 пайызға жеткен. Ал үш жылда қаланың 80 пайыздан астамын кәріз жүйесімен қамту жоспарланып отыр. Сонымен қатар қазіргі таңда 43,1 шақырымды құрайтын 65 көшеге орташа жөндеу жұмыстарын жүргізу мақсатында сметалық құжаттама әзірленіп, ведомствалық сараптамадан өткізілуде. Жалпы аталған жұмыстар толық аяқталғаннан кейін, 845 шақырым жолдың 568,6 шақырымы асфальт жабындысымен қамтылып, жақсы және қанағатты жағдайдағы жолдардың үлесін 67,3% жеткізу жоспарлануда.
