ҚР Еңбек сіңірген қызметкері, «Парасат» орденінің, Халықаралық «Алаш» әдеби сыйлығының иегері, Ақын хан қызындай Ханбибі Есенқарақызы 75 жаста. Ақынның мерейтойына орай «Ханбибінің биігі» атты республикалық жыр мүшәйрасы ұйымдастырылды. Қаратау дәстүрлі өнер мектебінде өткен бұл байқау ақындарға шабыт беріп, ұлттық поэзияның дамуына серпін қосты. Әділдігі мен өр мінезі үшін халық арасында «Хан қызындай Ханбибі» атанып кеткен Ханбибі Есенқарақызының қазақ поэзиясында алатын орны ерекше. Оның шығармашылығы тек көркемдік шеберлігімен ғана емес, терең мағыналылығымен, ұлттық рухты жырлауымен,бейнелеуімен дараланады. Бүгінде 14 көркем әдеби кітаптың авторы атанған ақынның туындылары қазақ оқырманына ғана емес, басқа да ұлт өкілдеріне танымал. Оның өлеңдерінің орыс, украин, қырғыз, өзбек, якут тілдеріне аударылуы – шығармаларының жалпы адамзаттық құндылықтармен үндесіп, шетел оқырмандарының жүрегінен орын тапқанын көрсетеді.Ақынның мерейтойына орай ұйымдастырылған шара әуелі Қаратау дәстүрлі өнер мектебінің өнерпаздарының қойылымымен басталды.Бұл қойылым ақынның шығармашылығының мазмұнымен де үндесіп,оның өлеңдеріндегі рухани тереңдік пен ұлттық құндылықтарды айшықтай түсті.
Мүшәйра барысында мінберден айтылған жүрекжарды лебіздер мен құрметке толы сөздерден кейін, ақын Ханбибі Есенқарақызы өз ризашылығын білдіріп, жиналған жұртшылыққа жүрек жарды тілегін білдірді. 50 ақынның қатысуы- бұл шараның жоғары деңгейде ұйымдастырылғанын көрсетеді. 2 күнге созылатын бұл мерейтой мазмұнды әрі мағынаға толы болмақ,дейді Хан апа.
Үш ай бұрын жарияланған Республикалық жыр мүшәйрасына еліміздің түкпір-түкпірінен 50-ге жуық ақын өз өлеңдерін онлайн жүйеде жіберген.Ақындардың жүрек түбінен шыққан жырлары әділқазылар алқасының жоғары бағасына ие болып, оқ бойы оза шапқан үздік 10 ақын жеңімпаз атанды. Жеңімпаздар өздерінің терең мазмұнды, сыршыл өлеңдерін көпшіліктің алдында оқып, халықтың ықыласына бөленді. Әрбір арнау Хан апаның поэзияға қосқан үлесі,әділдік пен махаббат, ұлттық құндылықтар мен адамгершілік тақырыптарында болды. Ақынағ арналған бұл жырлар тек мерейтойлық тарту ғана емес, қазақ әдебиетінің алтын қорына қосылған жауһар туындылар ретінде есте қалды.
Жырларын халыққа оқып беру арқылы ақындар тек өз таланттарын танытып қана қоймай, қазақ поэзиясының жаңа бағыттарын айшықтап, тыңдаған жұрттың жүрегін тербетті. Жалпы жүлде қоры 3 миллион теңгеге жуық болды.Әділқазылар шешімімен 3 ақынға арнайы жүлде тағайындалып, олардың әрқайсысына 150 мың теңге көлемінде қаржылай сыйақы берілді.Ал, 3-орын: Атырау облысы, Қызылорда облысы және Шымкент қаласынан келген талантты ақындарға бұйырды. Олар өздерінің жүрекжарды жырлары арқылы қазақ поэзиясының жаңа леппен өркендеуіне үлес қосқандарын дәлелдеді. 2-орын: Астана қаласы мен Алматы облысынан қатысқан ақындарға берілді. Бұл қаламгерлердің өлеңдері терең ой мен көркемдікке бой болып, әділқазылар мен көрермендердің ерекше ықыласына ие болды. Жас ақын Ахан Сабыржан 1-орынды иеленіп, өз таланты мен терең мазмұнды шығармашылығын тағы бір дәлелдеді. Мүшәйраның ең жоғары марапаты – Бас жүлде және 1 миллион теңге қаржылай сыйақы Иран Ғайып Оразбаевқа бұйырды
«Ханбибінің биігі» мүшәйрасы жеңімпаздар мен қатысушылар үшін де, жалпы қазақ поэзиясы үшін де есте қаларлықтай болды.Жиналған көпшілік ақынға арнайы сый-сияпат көрсетті. Жыр мүшәйрасына жиналғандар ақынның өр рухы мен қайсар болмысын ерекше атап өтіп, оның шығармашылығын қазақ әдебиетінің асқақ шыңы ретінде бағалады. Хан апаның әділдігі мен турашылдығы, поэзиясында көрініс тапқан ұлттық құндылықтарды дәріптеуі көпшіліктің жүрегіне жол тауып, оның қазақтың рухани әлеміндегі орнының ерекше екенін тағы бір рет дәлелдеді.
