Шымкентте цифрландыру басқармасы 2024 жылғы 10 айда атқарылған жұмыстар мен алдағы міндеттер бойынша БАҚ өкілдеріне есеп берді. Цифрландыруды дамыту аясында қалада бірқатар маңызды жобалар іске асырылған.Осы жобалар арқылы қала тұрғындарына көрсетілетін қызметтер сапасын арттыру, жаңа технологиялар енгізу және инфрақұрылымды дамыту жоспарланып отыр.
Цифрландыру басқармасының басшысы МҰХИТ КЕМЕЛОВ Smart City бағдарламасы аясында қалада жол қозғалысын басқару жүйесін жақсарту үшін барлық көше қиылыстарына интеллектуалды бағдаршамдар орнатылып жатқандығын айтты. Қаланың көгалдандыру саласында «zhasylshym.kz» платформасы арқылы жасыл желектердің есебі жүргізіліп, олардың саны мен жай-күйі бақылауға алынған. Бұдан бөлек, «Shymkent IT HUB» орталығы арқылы IT-стартаптарды дамыту мақсатында түрлі іс-шаралар мен шеберлік сабақтары өткізіліп, қаладағы IT-қоғамдастықтың белсенділігі артты-дейді.
Цифрландыру басқармасы биометриялық сәйкестендіру жүйесін енгізу, қоқыс алаңшаларында бейнебақылау орнату және қызмет көрсету процестерін автоматтандыру бойынша бірнеше пилоттық жобалар іске қосылғанын мәлімдеді. Сонымен қатар, қаланың қоғамдық орындары мен мектептерінде интернет желісі жылдамдығы арттырылып, қосымша Wi-Fi нүктелері орнатылған.Цифрландыру жұмыстарының нәтижесінде мемлекеттік қызметтердің 99%-ы электронды түрде көрсетіліп, тұрғындарға жоғары сапалы қызмет алу мүмкіндігі қамтамасыз етілген.
Жалпы статистикаға сүйенсек 10 айдың ішінде 55 іс-шара өтіліп,1559 қатысушыны қамтыған. Сонымен қатар 147 интернет жүйесі осал аймақтардың 100 аймағына интернет жүйесін орнатқан. Бұл алдыңғы жылғымен салыстырғанда әлде қайда жақсарған.Мұндай жобалар тұрғындардың өмір сапасын арттыруға және қала дамуын заманауи технологиялармен қамтамасыз етуге бағытталған.Цифрландыру басқармасы алдағы уақытта үлкен жобаларды іске асыру бойынша жұмыс жүргізетін болады.
