Қалаға шалғай орналасқан елдімекендер енді инфрақұрылыммен толық қамтылып, алдағы уақытта бірқатар мәселелер де шешімін табады. Аталған бағытта жұмыстар жүйелі түрде жасалынып келеді. Соның бірі Бозарық-3 ықшам ауданы. Елдімекен тұрғындары табиғи газға қосылды. Толығырақ әріптесім тарқатсын. Шымкент қаласында газ өткізу деңгейі осы жылы газға қосылған Қайнарбұлак, Бозарық және Қаратөбе ықшам аудандарын қосқанда 96%-ды құрап отыр. Қала бойынша тұтынушылардың жалпы саны 246 360-қа жетті. Бозарық ықшам ауданын газдандыру мәселесі қалаға шалғай жатқан елдімекен тұрғындарының өмір сапасын жақсартуға бағытталған тағы бір қадам болып отыр.
Бүгінде тұрғын үйлерді газдандырудың екінші кезеңі аясында 700-ден аса абонент көгілдір отынға қол жеткізді. Жыл соңына дейін тағы 700-ден астам тұтынушы қамтылады деп жоспарланған. Мегаполис дәл қазір 96 процент табиғи газбен қамтылған. Жыл соңына дейін 97 пайыздан асады деп жоспарланып отыр. Табиғи газға қосылу тұрғындарды пеш жағып, отын тасу қажеттіліктерінен босатып, қоршаған ортаны экологиялық жағынан таза ұстауды әрі жайлы өмір сүруді қамтамасыз етеді. Осылай деген «QazaqGaz Aimaq» акционерлік қоғамының бас директоры Бауыржан Асқаров тұрғындардың өмір сапасын жақсартуға бағытталған шаралар жалғасын табатынын жеткізді.
«Көгілдір отынға» қосылу шарасына қала әкімі Ғабит Сыздықбеков те қатысты. Жалпы Бозарық-3 ықшам ауданын газдандыру ісі – Шымкент қаласын газбен қамту жөніндегі көлемді бағдарламаның бір бөлігі ғана. 2024 жылы Қайнарбұлақ-1, Қайнарбұлақ-2, Қаратөбе тұрғын алаптары мен Бозарық ықшам ауданына көгілдір отын берілді. Сонымен қатар 2024 жылдың соңына дейін шаһардағы Қайнарбұлақ -2, Қайтпас-1, Ынтымақ, Тассай, Еламан ықшам аудандарын газға қосу жұмыстары аяқталмақшы. Нәтижесінде Шымкент қаласын газдандыру деңгейі жыл соңына қарай 97,4% құрайды.
Яғни, қала тұрғындарының жайлы, экологиялық қауіпсіз әрі сапалы өмір сүруі үшін мүмкіндіктер арта бермек. Ал, «QazaqGaz Aimaq» АҚ мамандары жылыту маусымы барысында тұрғындарды тағы да тұрмыстық газды қауіпсіз пайдалануға шақырды. Үйдегі түтін мұржалары мен желдеткіштерді уақытылы тексеру мен тазалаудан өткізіп тұру, табиғи және улы газ ауаға таралған жағдайда автоматты түрде белгі беретін дабылқаққыштарды орнату – қауіпсіздік кепілі екенін еске салды. Осы қарапайым ережелер табиғи газдың игілігін ғана көріп қоймай, қайғылы жағдайлардың да алдын алуға көмектесетінін естен шығармау қажет
