АЭС-ел экономикасын дамытудың негізгі факторы. Кезекті Қоғамдық штаб өкілдері 11 ші қалалық емхананың қызметкерлерімен кездесті. Ақ халаттылар халық қалаулылары мен сала мамандарына сұрақ қойып, өндіріс ошағын салудың маңызына тоқталды. Сұрақ-жауап форматында өткен жиында озық мемлекеттердің тәжірибесі сөз болды.
Атом электр стансасын салу — уақыт талабы дейді ғалымдар. Ауруханада медицина саласының өкілдерімен жүздескен қоғам белсенділері бейбіт атом энергиясын пайдалану – жаһандану үдерісіндегі ең өзекті мәселенің бірі екенін айтты. Ядролық энергияның тиімділігі мен тұрақтылығы таза энергия көзі ретінде қолдануға мүмкіндік береді. Қоғамдық штаб өкілдері атомдық энергетика саласының артықшылығы мен оған қажетті маман даярлау жайына тоқталды.
Қазіргі таңда әлем бойынша 32 елде 441 энергетикалық реактор қолданыста. Бұдан бөлек, тағы 17 мемлекетте 51 реактор құрылыс сатысында. Ал біздің елімізде де АЭС салу өзекті мәселе болып отыр.
6 қазан күні елімізде атом электр станциясын салуға қатысты жалпыұлттық референдум өтетіні мәлім. Бұл жиын халық үніне құлақ асатын мемлекет ретінде Қазақстан азаматтарына еркін шешім қабылдауға мүмкіндік береді. Ал тұрғындардың берген дауысы ел экономикасының дамуына ықпал етеді.
