Рахима плаза сауда кешінінің автотұрақ төлемақысы тұрғындар арасында үлкен талқыға түсті. Автотұрақ әкімшілігі алғашқы сағатқа 150 теңге, ал әрбір келесі сағатқа 50 теңге алуды міндеттеген. Дегенмен, бұл төлем жүйесі кейбір тұрғындардың наразылығын тудырып отыр.
Шаһарда ақылы автотұрақ мәселесі мәз болмай тұр. Халық ірі сауда кешінінің әрекеті заңға қайшы деп күдіктенеді. Аталған жайдың мән жайын анықтау үшін қала тұрғыны Қаратау аудандық әкімдігі пен тиісті мекемелерге жүгінген. Алайда, «Рахима Плаза» орталығының өкілдері бұл шешімнің заңға сәйкес екенін алға тартуда. Тұрғындардың айтуынша, бұған дейін орталықта тегін автотұрақ болған, алайды соңғы 2 ай ішінде ақылығы ауысыпты.
АНДРЕЙ МАВЛЮЧЕНКО — ШЫМКЕНТ ҚАЛАСЫНЫҢ ТҰРҒЫНЫ- РАХИМА плаза сауда кешенінің алдына шлакбаум қойылған. Ал автотұраққа кіргенің үшін 150 теңге, ал әр тұрған келесі сағатқа 50 теңге қосымша төлейсің. Сауда кешеніндегі дәретхана да ақылы. 100 теңге төлейміз. Қаладағы ешбір сауда кешенінде мұндай нәрсе жоқ. Әкімшілікке хабарластым. Тиісті органдарға шықсам, әр сауда кешенінде автотұрақты тегін пайдалануға мүмкіндік барын айтады. Осы күнге дейін бұл автотұрақ тегін еді. Жақын арада белгісіз себептерге байланысты ақылыға ауыстырып тастады. Адамдар бұның қаншалықты заңға сәйкес келетінін білгісі келеді. Сауда кешенінің негізін қалаушы шығып, мені біреудің тапсырысымен келдің бе деп айыптап тұр. Оны алдымен дәлелдесін. Мен ҚР азаматы ретінде тұраққа кірген сәтте 150 теңге, ал әр қосымша сағатқа 50 теңге не үшін төлейтінімді білгім келеді. Менің бұны білуге құқығым бар.
Еліміздегі заңнамаларға сәйкес, кез келген кәсіпорын төлемақыны нақты тәртіп бойынша белгілеуі тиіс. Жүргізушілер автотұрақтың бағасына қатысты сауал туындаса, жауапты мекемелерге шағымдануға құқылы дейді қала тұрғыны. Ал қалалық жер инспекциясы басқармасы өтініштің комиссия тарапынан қаралғанын алға тартып, жердің жекеменшік құқығына берілгенін айтады.
Рахима плаза сауда үйі-жекеменшік кешен. Кешеннің негізін қалаушы салықты уақытынан кешіктірмей төлейтінін айтып, аталған түйткілдің түйінін шешіп беретінін жеткізді.
Ал алдағы уақытта автотұрақтағы баға құны түсіп, қосымша төленетін теңге алынып тасталады. Кәсіпкер осылай деп уәде етті.
Тұрғынның жанайқайын қалалық салық басқармасына жеткізбек болдық. Алайда, әкімдік қызметкері хабарласқан сәтте басқарма басшысының байланыс телефоны өшірулі болды. Қызметкер салық басқармасының алдағы уақытта жауап беретінін айтады. Мәселені құзырлы органдардың тарапына жолдадық.
