«Әзірет Сұлтан» ұлттық тарихи-мәдени музей-қорығының ұйымдастыруымен Ясауи музейінде «Ұстазға құрмет – ұрпаққа өнеге» атты мәдени іс-шара өтті. Іс-шараның мақсаты – педагогтерді музей-қорықтың мәдени-ағартушылық жобаларымен таныстырып, музей мен мектеп арасындағы байланысты нығайту.
Іс-шараны музей-қорық директорының орынбасары Сұлтан Темірлан ашып, белсенді мектеп директорларына алғыс хаттар мен сый-сияпаттар табыстады. Ғылыми зерттеу және үйлестіру бөлімінің басшысы Берік Байболов пен Музей педагогикасы бөлімінің басшысы Динара Арынова сөз сөйлеп, бірқатар ұстаздарды «Ясауитану клубына» қабылдап, ізгі тілектерін білдірді.
Іс-шараға Түркістан қаласындағы жалпы білім беретін мектептердің әкімшілік өкілдері, тәрбие жұмысына жауапты педагогтер, қосымша білім беру мамандары, сынып жетекшілері мен пән мұғалімдері қатысты. Қонақтарға музей-қорық атынан естелік сыйлықтар табысталды.
Мәдени бағдарлама барысында «Конгресс-холл» көпсалалы кешенінің өнерпаздары өнер көрсетіп, музей педагогы Сәкен Қонысбеков әсем әннен шашу шашты. Ал «Жас экскурсовод» үйірмесінің мүшелері қонақтарға музей бойынша шолу экскурсиясын жүргізді.
Іс-шара аясында ұстаздар Ясауи музейінің тарихы мен құндылықтарымен танысып, музейдің мәдени-ағартушылық жобалары мен білім беру бағытындағы мүмкіндіктерін көрді. Сонымен қатар музейдің үшінші қабатында Ясауитану ғылыми орталығы кітапханасының кітап көрмесі және балалар шығармашылығының көрмесі ұсынылды. Экспозицияға музей-қорықтың үйірмелері мен мәдени-ағартушылық жобаларына қатысқан балалардың суреттері, қолөнер бұйымдары және басқа да шығармашылық жұмыстары қойылды.
