Шымкент қаласы білім басқармасы Психологиялық қолдау орталығы №88 жалпы орта білім беретін мектебінде «Балалардың психологиялық әл-ауқатын және құқықтарын қорғауды кәсіби қолдау» тақырыбында ашық есік күні өтті.Шара аясында тәжірибелі мамандар оқушыларға, ата-аналарға және мұғалімдерге психологиялық көмек көрсетудің әдістері туралы баяндап, тренингтер мен жеке қабылдаулар өткізді.
Іс шара әуелі концерттік бағдарламамен басталып,оқушылар өз өнерлерін көрсетті. Аталған шараға 150-ден аса ата-ана қатысып психологиялық орталықтың жұмысымен танысты. Еркін форматта өткен кездесуде мінберден сөз алған мемлекеттік орган қызметкерлері мен орталық мамандары ата-аналар мен мұғалімдерге психологиялық қолдаудың маңыздылығын түсіндіріп, олардың сұрақтарына жан-жақты жауап берді.
Аталған орталық өз жұмысын 2024 жылы Қазан айынанбастаған. Орталық өз қызметін екі негізгі бағыт бойынша жүзеге асырады: әдіскерлік жұмыс бөлім және психология бөлімі. Орталық 11 колледжбен,157 жалпы орта мектеппен және 130 жекеменшік мектептермен, 71 балабақшамен серіктестік орнатып бірлесе жұмыс атқаруда. Сондай-ақ полиция департаментімен,денсаулық сақтау басқармасымен және мемлекеттік органдармен тығыз әрі жүйелі түрде бірлесе жұмыс істейді.
Айта кетейік, ашық есік күні сәуір айының соңына дейін жалғасады. Осы уақыт аралығында кез келген ата-ана, мұғалім немесе оқушы орталық мамандарынан кәсіби кеңес алып, психологиялық қолдау қызметтерін пайдалана алады. Бұл бастама балалардың жан-жақты дамуына, олардың құқықтарын қорғауға және психологиялық саулығын қамтамасыз етуге үлкен үлес қоспақ. Психологиялық қолдау орталығы алдағы уақытта да осындай маңызды іс-шараларды жалғастыруды жоспарлап отыр.
