Түркістан облысы Полиция департаменті мен облыс прокуратурасының бастамасымен сотты болғандардың қайта қылмысқа баруына тосқауыл қою мақсатында 1000 адамның қатысуымен ауқымды республикалық форум өткізілді.
«Болашаққа мүмкіндік – жаңа өмір» тақырыбындағы іс-шараға облыс әкімі Нұралхан Көшеров, әкім орынбасар сондай ақ облыстық Полиция департаментінің бастығы Мұрат Қабденов, облыс прокуроры және Сыбайлас жемқорлыққа қарсы іс-қимыл агенттігінің басшысы мен құқық қорғау органдарының өкілдері, сондай-ақ пробация есебінде тұрғандар мен жергілікті тұрғындар қатысты. Облыстың бас полицейі Мұрат Қабденов: «Сотты болып, қылмысты атқару жүйесінің мекемесінен шыққан тұлға бірінші кезекте пробациялық есепке алынады. Осы тұста пробация қызметі, полиция, әлеуметтік қызметтер мен үкіметтік емес ұйымдарды белсенді түрде өзара тығыз жұмыс жасауға шақырамын. Яғни қылмыс жасаған адамды қоғамнан тыс қалдырмай, арнайы реабилитациялық бағдарламалар, психологиялық көмек көрсету, кәсіби дағдыларды үйретуіміз қажет»,- деп атап өтті.
Өңірде пробациялық есепте тұратындарды қоғамға бейімдеу, оларға әлеуметтік, медициналық, құқықтық көмек көрсету мәселесі күн тәртібінен түскен емес. Форум өмірде аяғын шалыс басып, қателіктерінен сабақ алып, жаңа өмір бастауға қадам басқан жағдайлар мысалында театрландырылған қойылыммен басталды. Сондай-ақ көрермендерге сотты болып, жазасын өтеп шыққандарды дұрыс өмірге баулу мақсатында полициямен атқарылған жұмыстар туралы бейнеролик көрсетілді. Айта кетейік абақтыда жазасын өтеушілер арасында есірткі тасымалдаумен айналысқандардың саны көп. Оңай ақша тауып мол табысқа кенелем деп алданғандар бұл жолдың дұрыс емес екенін түсінгендерін айтады.
Іс-шарада облыс әкімі Нұралхан Көшеров, облыс прокуроры Мұрат Тілеубердиев және басқа да құрметті қонақтар сөз сөйлеп, теріс әрекет салдарынан өз жазасын алған жандардың болашаққа мүмкіндік алып, жаңа өмір бастауға жауапкершілігін арттыру маңыздылығын атап өтті. Сонымен қатар түрлі құрылым өкілдерін қауіпсіз мемлекет пен үлгілі отбасын қалыптастыру үшін бірлесіп жұмыс істеуге шақырды. Форум соңы бос жұмыс орындарының жәрмеңкесімен жалғасты.
