Мұхтар Әуезов атындағы Оңтүстік Қазақстан университетінде “Dostyq” студенттік ассамблеясының ұйымдастыруымен “ЭтноQuiz”: Қазақстанның мәдени әралуандылығына ену” атты интеллектуалды іс-шара өтті. Аталған сайысқа ЖОО студенттері қатысып, өзара бақ сынасты.
Қазақстанның мәдени көптүрлілігі мен этностар арасындағы достықты дәріптеу мақсатында “Dostyq” студенттік ассамблеясы “ЭтноQuiz”: Қазақстанның мәдени әралуандылығына ену” атты интеллектуалды іс-шарасын ұйымдастырды. Сайыс бірнеше кезеңдерден тұрды. Қатысушылар жарыс барысында бірнеше интеллектуалды сұрақтарға жауап беріп маңызды тақырыптарды талқылады.
Шара барысында қатысушылар Қазақстанда тұратын түрлі этностардың тарихы, дәстүрлері, өнері мен ұлттық құндылықтары туралы сұрақтарға жауап беріп, өз білімдерін сынады. Сондай-ақ, командалар арасында достық қарым-қатынас орнатып, мәдени әртүрліліктің маңыздылығын тереңірек түсінуге мүмкіндік алды. Қатысушылар арасында Өзбекәлі Жәнібеков атындағы Оңтүстік Қазақстан университетінің студенті Камола Раджанова да бар. Ұлты өзбек, айтуынша мұндай сайыстар еліміздегі ұлттар арасындағы мәдени әртүрлілікті насихаттауға негіз бола алады.
Интеллектуалды ойын тартысты әрі қызықты өтіп, жеңімпаздар мен белсенді қатысушылар арнайы сыйлықтармен марапатталды. Ұйымдастырушылар мұндай іс-шаралар жастар арасында толеранттылықты, өзара құрмет пен ынтымақтастықты нығайтуға септігін тигізетінін атап өтті.
