Әуе шабуылына қарсы қорғаныс әскерлерінде рота мен батальондар сержанттары санатымен командирлік жиындар өтті. Шымкент гарнизонының 10216 әскери бөлімінің базасында өткен іс-шараға жүзден астам кіші командирлер қатысты.
Жиынның негізгі мақсаты сержанттар құрамының жауынгерлік және дене шынықтыру дайындығы бойынша сабақтарды ұйымдастыру мен өткізудегі әдістемелік және практикалық дағдыларын жетілдіру болды. Бағдарлама аясында саптық, атыс, тактикалық, медициналық және дене шынықтыру, сондай-ақ әскери топография бойынша сабақтар өтті. Жеке құраммен моральдық-психологиялық жұмысқа, көшбасшылық қасиеттерді дамытуға және әскери қызметтің қауіпсіздігін қамтамасыз етуге ерекше көңіл бөлінді.
Әуе шабуылына қарсы қорғаныс әскерлерінің үздік нұсқаушылары оқыту процесін жүргізді. Сержанттарды даярлау үшін оқу-жаттығу кешендері, тактикалық алаңдар, тренажерлер мен ату симуляторлары тартылды. Бұл оқу процесін қызметтің нақты жағдайларына барынша жақындатуға мүмкіндік берді. Жиын қорытынды сынақтармен аяқталды. Олардың нәтижелері бойынша үздік әскери қызметшілер анықталып, жоғары дайындық деңгейі мен көшбасшылық қабілеттері үшін марапатталды.
