Алматыда заңсыз қайта жабдықталған автобустар айыппұл тұрағына қойылды, — деп хабарлайды Polisia.kz. Алматыда жол-көлік оқиғаларының алдын алу және олардың салдарын азайту мақсатында «Қауіпсіз жол» республикалық жедел-алдын алу іс-шарасы басталды.
Аталған шараның негізгі мақсаты – жол қозғалысы қауіпсіздігін қамтамасыз ету, қоғамдық тәртіпті сақтау және көлік апаттарының санын азайту. Сондай-ақ жүргізушілер арасында профилактикалық жұмыстарды күшейтіп, жол қозғалысы ережелерінің сақталуын қатаң бақылауға алу. «Қауіпсіз жол» шеңберінде полиция қызметкерлеріне жүктелген басты міндет – жол қозғалысы ережелерін бұзу деректерін анықтау және олардың алдын алу. Олардың қатарында мас күйінде көлік басқару, қарама-қарсы қозғалыс жолағына шығу, қауіпсіздік белдігін тақпау, көлік жүргізу кезінде телефон пайдалану сынды өрескел құқық бұзушылықтар бар. Сонымен қатар апаттық жағдай тудыруы мүмкін көлік құралдарын анықтауға ерекше назар аударылады.
