Шымкентте жұмыспен қамту және әлеуметтік қорғау басқармасының ұйымдастыруымен «Еңбек адамы-елдің байлығы» атты бос жұмыс орындарының жәрмеңкесі өтті. Іс-шараны арнайы түрде қала әкімінің орынбасары Сәрсен Құранбек ашып берді. Жұмысшы мамандықтар жылына орай ұйымдастырылған бұл шараға қала тұрғындары, ЖОО мен колледждердің бітіруші студенттері және мектеп бітіруші түлектер қатысты.
Мемлекет басшысы Қасым-Жомарт Тоқаев биыл «Жұмысшылар жылы» деп бекітті. Осы уақыт ішінде техникалық және кәсіби білім беру жүйесін реформалау қажет. Сондай-ақ жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттау керектігін айтты. Бұл жәрмеңкенің басты мақсатыда осы.
Сонымен қатар жәрмеңкеге қала аумағындағы өндіріс, денсаулық, білім, қызмет көрсету және әлеуметтік салаларындағы жұмыс берушілер қатысты. Жалпы саны 100-ден астам кәсіпорындар, 1000-нан аса тұрақты, 1500 уақытша жұмыс орындарын ұсынды. Соның бірі «Arnur» микро қаржылық ұйымы. Колледж бітірген студенттерді де менеджер мамандығына 19 жастан қабылдайтындарын, 3 ай ақысыз практика есебінде оқытып, жалақы төлейтіндерін айтты.
Жәрмеңкеге келген Сымбат Темірхан 9 сынып оқушысы. Ұстаздары болашақта мамандық таңдаудан жаңылыспасын деген мақсатта, бағыт-бағдар бере отырып, алып келген. Сондай-ақ Сымбат шарада барлық кәсіпорындармен танысып, болашақта кім болатынын шешіпті.
Айта кетсек, бұл шара қалада еңбекке деген құрметті арттырып, әр мамандықтың шеберлігі мен еңбегін дәріптеді. Дипломы бар, жұмыссыз жүргендер үшін керемет мүмкіндік болды. Жұмысшы мамандықтар жылы аясында басталған бұл жәрмеңке алдағы уақытта тоқсан сайын өтіп тұрады дейді шараны ұйымдастырушылар.
