Маңғыстау облысы әкімінің орынбасары Тілек Жеткізгенұлы өңір басшысы Нұрдәулет Қилыбайдың тапсырмасымен Мұнайлы ауданының орталығынан салынып жатқан 150 орындық жаңа аурухананың құрылыс барысымен танысты. Жұмыс барысында автотұрақ, су, тоқ және т.б. мәселелер талқыланды. Тілек Жеткізгенұлы құрылыстың сапасына аса мән беріп, белгіленген кестеге сәйкес жұмысты аяқтаудв тапсырды.
Бүгінгі таңда құрылыс алаңында 300-ден астам құрылысшы еңбек етуде. Мұнайлы ауданы орталығында салынып жатқан аурухана 6 корпустан тұрады. Келісімшарт бойынша құрылыс жұмысы 2022 жылдың наурыз айында басталған. Құрылыс материалдарының және медициналық жабдықтарының қымбаттауына, сондай-ақ кейбір медицина жабдықтарының нарықта болмауына байланысты 2023 жылы жобаға түзету енгізу жұмыстары жүргізіліп, тапсыру уақыты ұзартылды. Айта кетейік, аурухананы ел игілігіне наурыз айында беру жоспарланды. Жаңа кешеннің іске қосылуы өңірдің медициналық әлеуетін арттырып, тұрғындардың денсаулығын жақсартуға септігін тигізеді.
