Шымкент қаласының ішкі саясат және жастар істері жөніндегі басқармасының “Жастар ресурстық орталығы”, Полиция департаменті және Қалалық прокуратурасының бірлесе ұйымдастыруымен жастар арасында құқықтық сауаттылықты арттыру, құқықтық мәдениетті қалыптастыру және құқықбұзушылықтың алдын алу мақсатында «Заң сіз бен бізге ортақ» тақырыпбында құқық қорғау органдарының қызметкерлерімен кездесу өтті.
Қазақстан Республикасының бас прокуратурасының тапсырмасымен ұйымдастырылған шараға мегаполис студенттері қатысты. Жиын барысында қалалық прокуратура қызметкерлері мен құқық қорғау органдарының өкілдері, жастар арасында қылмыстардың санын азайту сонымен қатар есірткіге қарсы күрес шараларын нығайту бойынша түсіндірме жұмыстарын өткізді. Салаға жауаптылар аталған жиынға қатысушыларға бірқатар профилактикалық іс-шараларды баяндады.
Елімізде есірткіге қарсы күрес жұмыстары белсенді жүргізіліп келеді. Қоғам дертіне айналған бұл мәселеге Шымкент қаласының салаға жауапты мамандары бей-жай қарай алмайтындығын жеткізді. Жастар арасында белең алған нашақорлықпен күрес жұмыстары күннен-күнге күшейтіліп келеді.
Кездесу барысында жастарға құқықтық сауаттылықты арттыру, қоғамда таралған лудомания мәселелері, интернет алаяқтық түрлері мен оның алдын алу, нашақорлықпен күрес және құқықбұзушылық тақырыптары жан-жақты талқыланды. Спикерлер жастармен ашық диалог жүргізіп, өз салаларындағы тәжірибелерімен бөлісті. Сондай-ақ, құқық қорғау органдарының арнайы әзірленген бейнероликтерін тамашалады. Қатысушылар өздерін қызықтырған сұрақтарға толыққанды жауап алды.
Айта кетейік, жастар арасында құқықтық сауаттылықты арттыру, құқықтық мәдениетті қалыптастыру және құқықбұзушылықтың алдын алу мақсатында мұндай іс-шаралар алдағы уақытта да жиі өткізіледі деп жоспарланып отыр.
