:Елімізде онкологиялық аурулар жасарып барады. Бірнеше жыл бұрын қауіпті дертке егде тартқан кісілер шалдықса, бүгінде жастар аты жаман аурудан жапа шегіп жүр. Мамандар жүйке жүйесінде туындайтын кеселдер денедегі қатерлі ісікті оятады дейді. Ал одан қалай емделуге болады?
Әлем бойынша өлімнің ең көп тараған себептерінің бірі – онкологиялық аурулар. Қатерлі дерт адамдың кез келген дене мүшесінде болуы мүмкін. Оның жіктелуі ісіктің орналасуы мен түрлі факторларға байланысты болады. Жалпы, бұл аурудың 100-ден астам түрі бар. Дегенмен, кейбір түрі қоғамда жиі кездесіп жатады.
Қатерлі ісіктің белгілері көбіне оның сатысына, сондай-ақ дененің қай жерінде орналасқанына байланысты. Десе де, әлсіздік, тез шаршау, салмақ жоғалту сияқты құбылыстар онкологиялық аурудың алғашқы белгілері болуы мүмкін. Дер кезінде ем-дом шаралары жасалмаса, дерттен айығу қиынға соғады.
Мамандар онкология дертімен ауырғандар саны былтырғы жылмен салыстырғанда пайызы артқанын айтып отыр. Мыңдаған отбасының үміті мен үрейі арпалысуда. Сондықтан сырқаттың алдын-алу үшін дертті ерте кезден анықтаған жөн.
